Betruef oder Alpsäge

Ave Maria

Es walte Gott ond Maria

Bhüet’s Gott ond erhalt’s Gott

Bhüet’s Gott ond öse lieb Herr Jesus Christ

Liib ond Seel, Hab ond Guet

Wo ofem Beg ome ischt.

Bhüet’s Gott ond dä hälig St. Moritz,

S’ganz Land, ond schick sini Gschpana omenand.

Bhüet’s Gott ond dä hälig St. Maati –

De s’guet lieb Vech bewahre ond erhalti.

Bhüet’s Gott ond dä hälig St. Antoni –

De s’guet lieb Vech vo Ogföll verschoni.

Bhüet’s Gott  ond dä hälig St. Sebastian,

Das ösem Vech ke Gsöcht ond ke Chranked Schade cha.

Bhüet’s Gott ond dä hälig St. Gall –

Mit ösere liebe hälige All.

Bhüet’s Gott allsame seis Fründ ode Find –

Ond die lieb Muette Gottes mit erem Chend.

Bhüet’s Gott vor allem Öbel ond Ofall –

Alls im Lendli ond  öberall.

Bhüet’s Gott ond ehalt’s Gott ond s’hälig Chrüz –

Gelobt sei Jesus  Christi i alli alli Ewigkeit, Amen.

Ave, Ave, Ave Maria!

 

Appenzeller Bet-ruf  (Ueberlieferung)